高考放榜的當年今日 「33222」乜嚟 ？

阿潮今日返工無耐，仲食緊個腸蛋麵早餐之際，就接到一個好耐都無見的表弟電話。唔經唔覺佢已經18歲，原來表弟今日放榜，問下我有何高見。

阿潮立即信心爆棚，終於到我俾意見後輩。但原來時代已經唔同晒，阿潮唔認老都唔得，同90後已經搭唔到咀。

第一時間，阿潮當然叫佢去撲莊啟程同恆商啦，但表弟好傻好天真咁問我

咩係莊啟程? 

我內心一驚，死啦，表弟讀書讀到懞咗。

當年莊啟程同恆商簡直係神級之選，會考無25分或以上，你根本無資格走去排隊。讀到恆商，基本上等同於半隻腳行咗入大學之門，當時阿潮真係恨都恨唔到。

點知表弟竟然冷冷地拋下一句：

恆商？啲同學話佢係老牌大專，當係後備先報喎...

再講，我都讀完中六準備升大學，報莊啟程重讀中六？

阿潮簡直晴天霹靂，原來依家放榜的學生已經直接撲大學學位，乜嘢「原校升讀中六」、「會考拔尖」已經OUT晒。

既然如此，我就問表弟幾多分，點知表弟好似鬼上身亂講一大堆Number，咩「43445」，我忍唔住鬧鬼佢：

你報六合彩攪珠呀？

唉，原來又係我依個老餅搞錯晒，所謂「43444」原來係DSE成績，由當年的A、B、C、D、E、F、U，已經變成依家的5**、5*、4、3、2、1。

以前成績幾一目了然，A就A，B就B，5**同5*搞到咁曖昧。當年用英文字母代表成績，仲可以笑吓同學「揸槍（F）」、「揸兜（U）」咁，當年有個同學拎5個F成績，班同學仲好衰笑佢係神槍手。

原本表弟想問問我意見，想睇下現在讀咩吃香。20分可以揀讀咩，阿潮還是一頭霧水。阿潮自問自己都係過來人，但竟然連分都唔清唔楚。

傾傾吓阿潮發現唔對路，表弟點解咁得閒同我傾咁耐？於是我忍唔住問：

阿表弟，你唔駛撲學校咩？

表弟無比淡定，佢話已經有「I大」的conditional offer，下午4點之前先去註冊，收線後準備瞓覺。佢問我報邊科最好，將來可以最快儲到上車首期。

又到想當年的時候，阿潮放榜前一晚，潮媽已經準備好晒「急救包」，內裡有成績表影印本一大疊同portfolio，加埋仲重過本黃頁，仲有大量金錢準備飛的撲學校，最重要就係潮媽在文武廟誠心為阿潮求的符。

當日一放榜，阿潮就馬上打電話向潮媽報告，一早請定假的潮媽聽到阿潮原校唔收，就同一時間飛的先去學校門口排隊，兩母子會合後就去叩門等即場面試。

當時好多人就算有一間學校收都唔會安心，總會去叩門、叩門、再叩門，總想搵一間更好的學校。

聼到表弟的語氣，阿潮衝口而出話「你真係好幸福」，點知表弟話：

我同學就真係幸福喇，佢老豆話考得唔好，唔洗唔開心，話要同佢歐遊半個月散下心喎。仲話順便過去睇下留學環境。

雖然時代已經唔同，但當年同今日放榜的考生都會有一顆緊張的心。阿潮仍然記得當日放榜好似打仗的情景，那時猶如世界末日的心情，到今日回頭看來，又沒有甚麼大不了。老土都要講句，條條大路通羅馬，各位DSE考生，共勉之！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。